Eusko Ikaskuntzak eta Kukai Dantza Taldeak sustatutako hausnarketa sortzailean 2.065 pertsona izan dira urritik abendura bitartean.
Adin guztietako eta kulturalki oso anitza den publiko ugari bildu da EzBerdin Berdinak ekimenaren zazpi saioetan. Dantza garaikidea eta tradizionala, bertsolaritza, antzerkia eta zuzeneko musika (txalapartatik hasi eta rap edo elektronikaraino) uztartuz, emozio sakonak eta hausnarketak piztu ditu hainbat gairen inguruan: identitatea, bizikidetza eta euskara, tradizioa eta modernitatea, belaunaldiak eta lurraldeak gizarte anitz eta aldakor batean.
Eusko Jaurlaritzak, Arabako, Bizkaiko eta Gipuzkoako aldundiek, Nafarroako Gobernuak, Euskal Hirigune Elkargoak eta Bilboko, Donostiako, Iruñeko eta Gasteizko udalek babestua, eta LABORAL Kutxaren eta EiTBren laguntzarekin, EzBerdin Berdinak ekimenak esperientzia intelektual eta emozional bat eraman du Euskal Herrian zehar, eta esperientzia parte-hartzailea izan da belaunaldien eta lurraldeen arteko eraikuntzaren eta elkarrizketaren gainean. Publikoak egindako ekarpen guztiak txosten batean jasoko dira, eta laster emango da ezagutzera.
Hala ere, esan daiteke, saioen ondoren publikoari bidalitako balorazio-inkestaren lehen irakurketa batean, oso modu nabarmenean adierazten dela proposamenaren kalitatea, bai maila artistikoan, bai edukiari dagokionez. 5 punturen inguruan: egokitasun tematikoak, dinamikak eta alderdi artistikoak 4,5 puntuko balorazioa gainditu dute, eta ia %100ak proiektuak eragin dien inpaktu emozionala nabarmendu du.
Eusko Ikaskuntzak bere poza adierazi du herri guztietan izan duen harreragatik eta bere bazkideen erantzun bikainagatik. Era berean, eskerrak eman nahi dizkio Kukai Dantza Taldeari eta errealizazio ahaztezin hau posible egin duten pertsona guztiei.
