Elkarrekin Autogobernua berritzen: Herritarren gunea

Herritarren gune honek Eusko Legebiltzarreko talde parlamentariek Autogobernu Lantaldean proposatutako Estatutu berri baterako oinarriak herritarrekin partekatzeko asmoa du. Eusko Legebiltzarra eta Eusko Ikaskuntzaren arteko kolaborazio marko batean gauzatuko da eta herritarron ekarpenak jasotzea eta adostasunerako aukerak eta joerak bilatzeko gunea izan nahi du.

Eztabaidarako abiapuntua talde parlamentario bakoitzak proposatutako oinarriak izango dira, hiru bloke tematikoren arabera landuko direnak:

• Subjektu politikoaren definitzea: zer eta nor gara? Komunitate politikoaren ezaugarritzeari buruzko hausnarketak bilduko ditugu bloke honetan. Hau da, komunitatearen autoizendapena (euskal nazioa, herria, herritargoa…) eta haren estatus juridiko-politikoari buruzkoak (autonomia erkidegoa, estatua, estatu-komunitatea, autonomia/burujabetza,…). 
• Elkarbizitzarako oinarriak; demokrazia eta eskubideak: Nolakoak gara eta izan nahi dugu etorkizunean? Elkarbizitzak oinarritzat dituen printzipio eta balioei buruz eta ordenamendu berri batek jasoko lituzken eskubide, eginbehar zein oinarrizko askatasunen inguruan arituko gara bloke honetan. 
• Autogobernu demokratikoa: Zertaz erabaki nahi dugu? Ze harreman mota izan nahi dugu beste lurralde eremuekin? Egungo errealitatetik abiatuta, etorkizunean izan nahi dugun herria garatzeko beharrezko ditugun autogobernurako tresnak –gaitasunak eta antolakuntza–, landuko dira azken bloke honetan. Funtsean, bigarren blokean zehaztutako eskubide eta askatasunetan sakontzeko beharrezko dugun autogobernu maila eta moduari buruz hausnartuko dugu. 

Larunbat goizeko saio honetan (9:30-14:30) metodologia parte-hartzailea erabiliko dugu eta giro eroso eta atsegin batean partekatuko ditugu gure nahiak eta desioak, kezkak eta galderak. Gure komunitatearen etorkizuna eraikitzea delarik denon helburua, gauzatuko dugun dinamika hiru printzipiotan oinarrituko da: berdintasuna, errespetua eta efikazia. 

Eusko Legebiltzarreko talde parlamentario bakoitzaren proposamenak aztertzeko eta saioa eraikitzailea izan dadin dokumentu hauek jarriko ditugu eskuragarri:

• Legebiltzar-taldeen proposamenen sintesi dokumentua.
• Sintesi dokumentuaren eskema.
• Legebiltzar-talde bakoitzaren proposamenaren laburpena.
• Parte-hartze dinamikaren printzipioak.

Elkarrekin Autogobernua berritzeko hiru herritarren-gune egongo dira, ordu berean gauzatuko direnak: Bilbo, Donostia-San Sebastián, Vitoria-Gasteiz.