Asmoz Fundazioak 31 formazio ikastaro jarri ditu abian 2013/2014 ikasturtean. Ikasketa eremu ezberdinetako gaiak eta programak plazaratu ditu: Soziolinguistika eta Hezkuntza alorrekoak, Enpresa munduari loturikoak, Ingurumena eta Energiaren ingurukoak, Artxibogintza esparrukoak, Zuzenbidearen eremukoak, Gizarte Zientzietakoak eta Komunikazioari dagozkionak, besteak beste. Eskainitako ikastaro motari dagokionez, EHU/UPVrekin eta UNEDekin elkarlanean, zortzi graduondoko antolatu ditu eta gainontzeko ikastaroak etengabeko prestakuntzakoak izan dira. Online eskaini dira ikastaro gehienak. Berrikuntza eremuan ere lan egin du Fundazioak; prestakuntza masibo eta irekirako (MOOC) software libreen plataforma ezberdinen inguruko ikerketa bat burutu du Saiotek Programaren barruan. 1.170etik gora izan dira Asmoz Fundazioren ikastaroetan parte hartu duten ikasleak. Gainditz-tasa altuak lortu dira bi ikasketa mailetan: %76,7 graduondokoetan eta %88,2, berriz, etengabeko prestakuntzan. Ikastaroa bertan behera utzi duten ikasleen kopurua oso murritza izan da; %3. Oro har, ikastaroz ikastaro datuak aztertu ondoren, esan daiteke ikasleak gustura geratu direla jasotako formazioarekin. Adibide gisa, oraintsu amaitu berri den Liburutegi laguntzaile ikastaroan bildutako emaitzak dituzue jarraian: Liburutegi laguntzaile(40 ikasle) - %97k irakaslearen arreta oso ona izan dela adierazi dute
- %90k Asmozetik jaso duten zerbitzua oso ona izan dela adierazi dute
- %70ek materialen kalitatea oso ona izan dela adierazi dute
- %91k ikastaroa oso baliagarria gertatu zaiela adierazi dute
Ikasleen balorazio guztiak aintzat hartzen ditugu datozen edizioak ahalik eta ondoen antolatzeko. Zentzu horretan, 2014/2015 ikasturteko formazio eskaintza prestatzen ari da Asmoz Fundazioa eta dagoeneko ikastaro batzuen informazioa prest dago webgunean: www.asmoz.org
