Euskal hezkuntza sistema: etorkizuna elkarrekin lantzen. Bateratze foroa

2024/06/15 09:30 - 14:00

Irun. Ficoba

Ekainaren 15ean burutuko den bateratze-foroan, herri ikuspegi batetik hezkuntza sistemari begiratzen dion ekimena mugarri nagusiaren atarian kokatuko da; Eusko Ikaskuntzaren XIX. Kongresua.

Euskal Herriaren kohesioa –jendarte eta lurralde kohesioa–, eta hezkuntza sistema berarena trinkotzeari begira, hezkuntzatik eraiki daitezken proiektu komunen identifikazioa eta aurrera eramateko beharko dituzten estrategiak, ezagutzak eta harremanak landuko ditugu.

Partekatu:

Testuingurua

Foro hau Etorkizuneko Euskal Hezkuntza Sistemaren inguruko herri-gogoetaren baitan kokatzen da. Partehartzean oinarritutako gogoeta hau, fase desberdinetan burutzen ari gara. Lehenengo fasean (2021-2023), bi helburu nagusi lortzeko lan egin dugu: Euskal Herriko lurralde guztietako herritar giltzarri-zubigileak, gazteak, interesdun aktoreak, hezkuntza komunitatea mugiaraztea eta konektatzea; lehentasunezko gaiak modu partekatuan eta lurraldetasun ikuspegi batetik identifikatzea. Horretarako lurralde desberdinetan foro parte hartzaileak burutu ditugu -Donostian, Kanbon, Iruñean- eta gazteen ahotsa jasotzeko berariazko foroa gauzatu ere (informazioa eskuragarri).

Lehenengo fasean jasotakoak hurrengo urratsen azterketaren abiapuntuzko oinarri orientatzaile gisa hartuta, 2023ko irailean Ficoban burututako foroan, bigarren faseari eman genion hasiera. Kohesioa praktikan eraikitzen denez, etapa bakoitzeko praktikara jaitsi ginen ekimen kohesionatzaileak lantzeko helburuarekin. Honek aukera eman digu aurreko fasean landu ez diren bi etapatera hurbiltzen hasteko: Lanbide Heziketa eta Unibertsitatea-Goi Maila.

Orain ematen dugun urratsarekin, identifikatutako problematikei erantzuteko eta aukerei bidea emateko etorkizuneko lan-ildo estrategikoen lanketan murgilduko gara berauek beharko dituzten ezagutzak, ekosistemak eta eraiki beharreko harreman motak definituz.

Helburuak

Euskal Hezkuntza Sistema eraikitzeko etorkizuneko lan-ildo estrategikoak lantzea eta berauek beharko dituzten ezagutzak, ekosistemak eta eraiki beharreko harreman motak definitzea. Helburu hau hezkuntza-etapa bakoitzaren egoera eta irakurketatik planteatuko da lurraldetasunaren ikuspegi batetik, hezkuntza sistema bakoitza kokatuta dagoen errealitate sozio-politikoa kontuan hartuz.
Etapen arteko kohesioa ahalbideratuko luketen proiektu-ideiak aztertzea.

Metodologia

Aurreko faseetan kohesio-gune berriak eraikitzeko identifikatutako gakoek planteatzen dituzten problematikak, gainditu beharrekoak eta aukerak jarriko ditugu eztabaidagai elkarlanerako bektore gisa.

Horretarako lanabes hauek eskainiko ditugu:

Eusko Ikaskuntzaren gogoeta markoa: begirada komuna eraikitzen lagunduko digun oinarria eta galdera markoak.
Orain arte prozesu partehartzailean zehar jasotako gakoak: hezkuntza etapa guztiak lotzen dituzten lehentasunak eta erantzun beharrekoak.
Euskal Herriko hezkuntza sistemek elkar-ulertzeko oinarriak: sistema bakoitzaren ezaugarriak eta lurralde bakoitzaren errealitatera hurbilketa deskriptiboa.
Gako orokorretatik abiatuta etorkizunerako erronkak eta hauei lotutako galderen definizioa.

Foroan landuko diren dinamiketan banakako-gogoeta eta eztabaida kolektiboa ahalbideratuko dituzten metodologiak aplikatuko dira.