Gazte lankidetzarako sareak

Gazteen aniztasuna eta gobernantza eredu berriak: mugaz gaindiko gazte lankidetzarako oinarriak finkatzen.

Eusko Ikaskuntzak 2016-2018 urteetan garatutako Geroa Elkar-Ekin prozesuaren baitan kokatzen da proiektua. Euskal Lurraldeen Liburu Berdea zein Zuriaren oinarrietan agertutako premia bati erantzuna eman nahian: Euskal Herriko lurralde ezberdinetako gazteak euren premiez eztabaidatu eta elkar aritzeko elkartu beharra. Horrela, helburu nagusia izanik Euskal Herriko gazte banako zein eragileak harremanetan jartzea eta haien arteko sarea sortzea, euren kezka eta gobernantza eredu berriak jasotzea bilatuko da.

Eremu tematikoak
Etorkizuna Irudikatu
Kategoria
Ikerketa
Egoera
Indarrean
Denboraldia
2019-01-01-2020-12-31

 

Aurrekariak: Euskal Herriko lurraldeen Liburu berdea eta Liburu Zuria

Eusko Ikaskuntzak Liburu Zuriaren oinarriak ezarri ditu 2018an, eta gazteok gure aletxoa jarri dugu oinarri horietan. Alabaina, zerbait eraikitzen jarraitzeko oinarri horiek handitu egin behar dute Liburu Zuriaren oinarriei gure begirada propioa txertatuz, hau da, gazteon adimen kolektibotik eratorriko dena gehituz. Horretarako, Euskal Herriko gazteen sistema adimentsu kolektiboa garatzea nahi da; Euskal Herriko gazte anitzen adimen kolektiboaren elkargune izango dena, gazteon begirada Liburu Zurian txertatua eta garatua izan dadin.

Aurreko prozesu kongresualak irekitako elkarlanari segida emateko helburua du. Batetik, sortutako ideia, sinergiek eta saretzeak jarraipena eta sakontzea behar dutelako; bestetik, Euskal Herriko gazteoi eragiten diguten erronkei aurre egiteko modu kolektiboan proiektu zehatzen identifikazioa beharrezkoa delako.

Helburua: mugaz gaindiko gazte lankidetzarako oinarriak eraikitzea

Esku artean dugun proiektua mugaz-gaindiko gizarte berrikuntzarako ariketa bat da, hain zuzen, gazteak ardatz hartzen dituena, alor anitzeko zein elkarren arteko  jakintza bultzatzeko asmoa duena. Hala, proiektu honek, mugaz gaindiko euskal lurraldeetako hiritarren arteko praktiken zein egitasmo partekatuen elkar trukaketa bultzatzeko asmoa du. Modu honetan, diziplina anitzeko ikuspegi batetik, elkarrizketak, jardunaldiak eta topaketak antolatuko ditugu, arduratzen gaituzten arazo eta erronka komunak identifikatzeko esparru bat eskainiz. Bereziki, ondorengo alorrak landuko ditugu: Hezkuntza (formala zein informala), gobernantza (parte-hartzea eta ahalduntzea), sozio-ekonomia (ongizate materiala) eta hizkuntza (euskara eta hizkuntza politikak).

Proiektu kideak

Eusko Ikaskuntzarekin batera proiektu honetan parte hartzen duten kideen arteko lankidetza espazioak, Euskal Herriko gazteentzako baliagarriak izango diren praktika onak eta balioak partekatzeko sareak sortzeko aukera eskaintzen digu:

Euskadiko Gazteriaren Kontseilua (EGK): Erakunde honen helburuetako bat gazteen eta gazte elkarteen parte-hartzea sustatzea da, era berean, gazteengana zuzendutako politika publikoen garrantzia azpimarratzea, erakunde publikoek gazteen ikuspegia aintzat hartzea, baita ere, gazteen eta gazte elkarteen, eta, erakunde publikoen arteko zubi lana egitea. Horretarako, Euskal Autonomia Erkidegoko erakunde askorekin kooperazio hitzarmenak dauzka, hala nola, Eusko Jaurlaritzarekin, Emakunderekin, Euskal Herriko Unibertsitatearekin, Gipuzkoako, Arabako eta Bizkaiko Foru Aldundiekin, eta, Donostiako, Bilboko eta Gasteizko Udaletxeekin. (web orrirako sarbidea:

Nafarroako Gazteriaren Kontseilua (NGK): Nafarroako Gazte Kontseilua 1986an sortu zen Nafarroako gazteria ordezkatuko zuen organoa izateko. Gazteriaren parte-hartzea bideratzen bilatzen du, era berean, gazteen eta gazte erakundeen eskubideak eta interesak babesteko lan egiten du. Plataforma plural  bat izateko ahaleginetan gogoeten, ideien eta esperientzien arteko elkar trukaketa bultzatzen du. Era honetara, erakunde publikoekiko, agente sozialekiko eta komunikabideekiko gazteek dauzkaten proposamen, aldarrikapen eta salaketak bideratzen ditu. Guzti hau gazteek dauzkaten arazo, kezka eta xedeei erantzun bat emateko egiten du, baita ere, hauen bizi kalitatea hobetu dadin.

Udako Euskal Unibertsitatea (UEU): Irabazi asmorik gabeko elkarte kultural bat da. Ipar Euskal Herrian sortu zen 1973an, hortik aurrera, bere misioa Unibertsitate euskalduna sortzea izan da. Helburu hori hizpide izanik hiru izan dira bere lan esparruak: Euskararen eta unibertsitatearen arteko zubiak eraikitzea, komunitate zientifiko-intelektual euskalduna batzea; eta, diziplina unibertsitarioak sortzea eta hauek gizartearen zerbitzura jartzea. Honekin batera, gazteengana zuzendutako Iker Gazte iniziatiba azpimarratu nahi dugu, ikertzaile gazteen sareak sortzea izanik helburua.

Faseak eta Parte Hartze espazioak

1. Diagnostikoa eta kontzeptualizazioa

Diagnosi partekatua burutzeko asmoarekin, hiru eskualdetako gazte erakunde esanguratsuekin hausnarketa elkarbanatuko da. Foroetan sakonduko diren lan ildoen diagnosi partekatu bat bilduko duen hasierako txosten bat sortuko da.

2. Gazte Foroak

Antzemandako erronken aurrean, ebazpen mekanismoen proposamenak lantzeko topaketa parte-hartzaileak burutuko dira. Lehen aipatutako gaietan sakonduko da: hezkuntza (formala zein informala), gobernantza (parte hartzea eta ahalduntzea), sozioekonomia (ongizate materiala), hizkuntza (euskara eta hizkuntza politikak).

Gazte Foroa Donostia (2019.10.26)
• Gazte Foroa Iruña (2020ko otsaila)
• Gazte Foroa Baiona (2020ko martxoa)

3. Mugaz-gaindiko Gazte Foroa (2020ko maiatza)

Eskualde arteko laugarren foro bat antolatuko da, zeinak aurreko foroetan egindako proposamenetan sakontzeko aukera eskainiko duen, baita, mugaz gaindiko ikuspuntu batetik, proposamen berriak aurkezteko aukera eskainiko duena ere. Horretarako, “Open Space” teknika berritzailea baliatuko da.

Dokumentuak

GAZTE FOROETARAKO EZTABAIDAGAIAK ETA EDUKIAK

proiektu kudeatzailea: 

Beatriz AKIZU AIZPIRI