1. deialdia. Eusko Ikaskuntzaren ikerketa sustatzeko eta babesteko programa

1. Deialdiaren xedea

Etorkizuneko ikerketa-ildoak sustatzeko, Eusko Ikaskuntzak 3 laguntza /beka programa (aurrerantzean, LAGUNTZA) eskaintzen ditu 2024-2025 ikasturterako, garatu beharreko ikerketa- edo azterlanak bultzatzeko.

2. Norentzat

Eusko Ikaskuntzaren ikerketa sustatzeko eta laguntzeko programa masterandoei zuzenduta dago bereziki, baina doktoregaiei eta graduetako 4. mailako eta gradu bikoitzetako 5. mailako ikasleei ere irekita egongo da (aurrerantzean, programaren laguntza jasotako guztiak, bakarka edo taldean, ONURADUNA gisa izendatuko dira).

Ikerketa edo azter-lana ikasle bakar batek nahiz ikasle-talde batek aurkeztu ahal izango du, beti ere, laguntza bakarra izanik talde osoarentzat.

3. Iraupena

Programek 6 hilabeteko iraupena izango dute, urtarriletik ekainera (12 hilabetera arte luzatu daitekeelarik, programaren onuradunak hala eskatuz gero).

4. Ikerketa gaiak

Eusko Ikaskuntzak honako arlo eta lan-ildoei buruzko ikerketa edo azterlanak hobetsiko ditu:

• Euskal Herriko jendarte eta lurralde-kohesioaren garapenerako Euskal Hezkuntza Sistema aztergai
• Despopulazioa geldiarazteko politikak eta estrategia aplikatuak: kasu arrakastatsuen azterketa konparatiboa
• Marko juridikoaren aukerak eta mugak toki erakundeen antolakuntza, eskumen eta finantzaketan
• Landa eremua, lehen sektorea eta gazteak Euskal Herrian: aukerak, oztopoak eta etorkizuneko erronkak
• Euskal Herriko landa-herrietan errotzeko faktoreen azterketa konparatiboa
• Euskal Herria 2050: proiekzio demografikoa
• Tokiko elikagaien banaketan dauden erronkak eta aukerak ebaluatzea: tokiko hornidura-kate laburren aukera
• Epe luzerako finantza-iraunkortasuneko estrategiak Euskal Herrian ongizate politiketan
• Automatizazioaren/digitalizazioaren eragina enpleguan eta ongizatean: lan- merkatura egokitzeko ikuspegien eta estrategien azterketa
• Zainketen balio ekonomikoa kuantifikatzea
• Euskal nortasuna eta euskal kultura etorkinen artean: ezagutza maila, hurbiltasuna eta aukerak
• Adimen artifiziala eta euskal kultura: erronkak eta aukerak
• Euskal Kulturaren kudeaketa transmisioari begira: alde sendoak, ahulak eta etorkizuneko erronkak
• Gai librea

5. Hizkuntza

Ikerketak edo azterketa-lanak euskaraz, gaztelaniaz edo frantsesez egin ahal izango dira.

6. Laguntzaren zenbatekoa

Eusko Ikaskuntzak 2024-2025 ikasturtean 3 laguntza eskainiko ditu, bai norbanako bezala aurkeztuta zein taldeari bere osotasunean, 2.000 euro garbikoa bakoitza.

Eusko Ikaskuntzak 1.000 euro garbi ordainduko dizkie laguntzaren onuradun bakoitzari, taldeak onuradun bakartzat hartuta, 2024ko abenduan, eta gainerako 1.000 euroak lana entregatu eta baloratu ondoren (2025eko ekainean edo programa entregatzeko ezarritako egunean).

Egindako lana esleipenean zehaztutako epean aurkezten ez bada edo eskatutako kalitate-maila betetzen ez duela uste bada, bigarren ordainketa ez da egingo eta lehenengo ordainketa onuradunak itzuli egin beharko du.

Eusko Ikaskuntzak zuzenean ordainduko dio ikasleari edo taldeko kideei esleipenean ezarritako zenbatekoa, egoki iritzitako bitartekoen bidez.

Euskal Autonomia Erkidegoko eta Nafarroako Foru Komunitateko zerga-betebeharrei dagokienez, jasotako laguntzak Pertsona Fisikoaren Errentaren Gaineko Zergarekiko salbuetsita egongo dira inolako atxikipenik jasan gabe. Era berean, Gizarte Segurantzari dagokionez, laguntza hauek ez dute inolako kotizatzeko beharrik suposatzen.

7. Hautagaitzak aurkeztea

Eusko Ikaskuntzaren laguntzaren onuradun izan nahi duten pertsonek agiri hauek aurkeztu beharko dituzte eskabidea bideratzeko:

• Eskaera-inprimakia beteta
• Hautagaiaren curriculum vitaea, eskaera-inprimakian erantsi beharrekoa
• Hautagaiaren NANaren kopia, eskaera-inprimakian erantsi beharrekoa

Hautagaitzak aurkezteak berekin dakar oinarri hauetan zehazten diren baldintzak berariaz eta formalki onartzea.

8. Betebeharrak

Eusko Ikaskuntzaren laguntza bateragarria da beste erakunde batzuetatik jasotako laguntzekin. Hala ere, hautagaiak edo hautagaiek zehaztu egin beharko dute zenbateko laguntza eta zein erakunderengandik jasotzen duten, edota erantzunaren zain dagoen.

Halaber, Eusko Ikaskuntzaren laguntzan onuradun izandako lanak bestelako lehiaketetan ere aurkeztu ahal izango dira.

9. Epeak

Eskabideak aurkezteko epea hau izango da: 2024ko irailaren 16tik 2024ko azaroaren 22ra.

10. Epaimahaia eta hautaketa-irizpideak

Hautagaiak honako erakunde hauetako ordezkariek osatutako epaimahaiak baloratuko ditu:

• Eusko Ikaskuntza
• Euskal Herriko Unibertsitatea
• Deustuko Unibertsitatea
• Nafarroako Unibertsitatea
• Nafarroako Unibertsitate Publikoa
• Mondragon Unibertsitatea
• UNED, Urrutiko Hezkuntzarako Unibertsitate Nazionala
• Paueko eta Aturri Herrialdeetako Unibertsitatea

Epaimahaiak irizpide hauek hartuko ditu kontuan:

• Aukeratutako ikerketa-gaiaren interesa eta gaurkotasuna.
• Proposatutako iker- edo azter-metodologia.
• Hautatutako gaiak eta metodologiak etorkizunean ikerketa-ildo nagusi izateko eskaintzen duten aukera eta irismena.
• Lana egiteko erabiliko den hizkuntza euskara izatea hobetsiko da.
• Hautagaiak hautatzerakoan lurralde-, genero- eta hizkuntza-oreka kontuan hartuko da.

11. Epaimahaiaren erabakia

Eusko Ikaskuntzak 2024ko abenduan jakinaraziko du epaimahaiaren erabakia. Jakinarazpenean, laguntzaren onuradunen izen-abizenak, aukeratutako ikerketa- edo ikasketa-lanen izenburua eta horiek gauzatzeko epeak zehaztuko dira.

Jasotako proposamenek ez badute eskatutako interes edo kalitate-mailarik, epaimahaiak programaren bat edo batzuk esleitu gabe utzi ahal izango ditu.

12. Programaren beste ekarpen batzuk

Laguntzaren onuradunek, unibertsitatean izan dezaketen tutoreaz gain, Eusko Ikaskuntzako aditu baten laguntza ere izan dezakete, nahi izanez gero.

Era berean, laguntzaren onuradunen ikerketa-lanak edo azterlanak Eusko Ikaskuntzaren sozializazio-ekitaldietan integratu ahal izango dira: jardunaldietan, mintegietan, hitzaldi-zikloetan, kongresuetan, RIEV dibulgazio-aldizkarian... edo Eusko Ikaskuntzarekin adosten diren eta bi aldeen onespena duten bestelako euskarrietan.