Askotariko segregazioari nola erantzun hezkuntza sistematik? Adostasunerako bide partekatu baterako oinarriak

2022/06/04 09:00 - 14:00

Miramar Jauregia. Donostia

Segregazioari aurre egiteko neurriak hartzea da gizarte aurreratu gisa dugun erronkarik nagusienetako bat. Herri ikuspegi batetik adostasunak lantzea funtsezkoa izango da eta, horretarako, konfiantza sareak josteko guneak sortzea garrantzitsua izango da.

Eusko Jaurlaritzako Hezkuntza Sailarekin batera gaian sakontzeko irekitzen dugun foro partehartzaile honekin, gizartearen ahotsa(k) jasotzea nahi dugu adostasunerako bide partekatu baterako “dekalogoa” eta erantzun proposamenak jasotzeko helburuarekin.

Partekatu:

Testuingurua

Gizarte erronkei erantzuteko behar dugun etorkizuneko hezkuntza sistema da gure hausnarketa gaia. Erantzun partekatuak askoren artean bilatzeko, gaietan sakontzeko eta adostasun bideak josteko gune egonkorrak eta anitzak sortzea da bilatzen duguna.

Horretarako, elkarlanean oinarritutako bi bide ditugu irekita. Batetik, Etorkizuneko Euskal Hezkuntza Sistemaren inguruko herri-hausnarketa abian du Eusko Ikaskuntzak. Asmo honekin Euskal Herriko Hezkuntza Sistemaren Liburu Zuria osatzea bilatzen dugu. Euskal Herriko jendartearen erronka nagusiak hausnarketa ardatz hartuta, lurralde desberdinetan partekatzen ditugun hezkuntza lehentasunak modu kolaboratiboan identifikatu eta etorkizuneko eszenatoki desiragarriak definituko ditugu horiei erantzuteko beharko lituzketen proposamenen inguruko adostasunak landuz. Honi bidea emateko, Euskal Autonomi Erkidegoan, Nafarroako Foru Erkidegoan eta Iparraldean foro partehartzaileak burutuko ditugu 2021ko irailean burututako Ehun zubigileen foroari jarraipena emanez.

Bestetik, erantzukizuneko ibilbide honetan, Euskal Herriko eremu administratibo desberdinetan irekita dauden prozesu desberdinetan, gaietan sakontzen lagunduko dugu. Hau horrela, Eusko Jaurlaritzaren Hezkuntza Sailarekin irekitako lankidetza markoan, 2022ko ekitaldian bi gaien inguruan sakontze ariketa partekatua burutzen hasiko gara: askotariko segregazioari nola egin aurre hezkuntza sistematik eta irakasleen ahalduntzea etorkizuneko erronken aurrean.

Jarduera honetan, Eusko Ikaskuntzak adostasunak eta desadostasunak kudeatzen lagunduko duen eremu deliberatzailea eskaini nahi du: herritarrak, eragileak sozialak, adituak eta erakundeak eroso bilduko duen eremua. Euskal jendartearen erronka nagusiei erantzuteko behar dugun hezkuntzarekin lotutako nahitako eszenatokiak landuz, gizarteko giltzarriak eta zubigileak konektatzea bilatuko dugu elkarrekin etorkizuneko Euskal Hezkuntza Sistema sortzeko.

Testuinguru honetan kokatzen da aurkezten dugun foroa, partehartzera gonbidatzen zaituguna.

Helburuak

Irekitzen dugun foro honekin, askotariko segregazioa irudikatuz, segregazioari aurre egiteko gizartearen ahotsa(k) jasotzea nahi dugu adostasunerako bide partekatu baterako “dekalogoa” eta erantzun proposamenak jasotzeko helburuarekin.

Ariketa hau burutzeko bi saio burutuko dira.

Lehenengo saioan, gaur aurkezten duguna, adostasunerako bide partekatua egiteko azpimarra non jarri behar dugun landuko dugu, beste modu batera esanda, hausnarketa partekatua egiteko “dekalogoa” osatuko dugu.

Bigarren saioan, landutako azpimarrei, osatutako dekalogoari, erantzuna emango diogu proposamenak landuz. Neurrietara hurbilduko gara. Bigarren saio hau irailaren 17an burutzea aurreikusten da.

Metodologia

Parte hartze metodologiaren bitartez, talde txikietan bilduta eta konfiantza giro batean, bi galdera nagusi hauei erantzuna emango diogu:

Segregazioaz ari garenean, zertaz ari gara? Definizio partekatu batera hurbilduko gara galdera honi erantzuna emanez.
Zer ekarriko zenuke dekalogo batera? Adostasunerako bide partekatua egiteko lerro buruak jasoko ditugu.

Hausnarketa kokatzeko, segregazioaz ari garenean zertaz ari garen kokatzen lagunduko digun hitzaldi markoa izango dugu. Bestalde, gizarte bidezkoagoa eta integratzaileagoa eraikitzeko idea positiboak jasotzeko helburuarekin, ahots ezberdinak eta esperientziak entzungo ditugu.

Aurrezko-aurreko parte hartzea izango da eta aldez aurretik izena ematea beharrezkoa izango da.

Dokumentazioa

Askotariko segregazioari nola erantzun hezkuntza sistematik? Adostasunerako bide partekatu baterako oinarriak

Lehen lan-saioan bildutako edukiak
2022ko ekainak 4, Miramar Jauregia Donostia

Segregazioaren Ezaugarritze eta Ulermen Partekatua

Ekainaren 4ko saioan jasotako edukien sintesi dokumentua